billymilja

–

üsi biuder hange immer no

über mim bett, eigentlech scho fiu

z lang wiu i gseh se nümm würklech, aber

mängisch chöme mer momänte mit

dir i sinn, mir jung und chli irgendwenn

dusse im bikini am strand, lö der

sand dür üsi händ lo rinne und t

wäut sich säuber lo si, mir hei das

so guet chönne aber hüt isch z

einzige wo blibt es biud dervo im

chopf wo langsam verschwümmt, i

versueche so z tue aus würds mer nüt

usmache, dasde deheime bisch ohni mi

z gseh, du hesch geng gseit hüt isch

hüt und morn isch morn, i bi mer nie so

bewusst gsi, wasde würklech dermit

gmeint hesch, aber hüt isch hüt, mini

liebi, ohni di und

morn äue ou.

–

31/03/2016 

© Sibyl Kurz