billymilja

–

au die zyt, au die zyt,

daddy, daddy,

wo söui bloss

häre dermit?

–

es füeut sech wie gester ah, die nomitäg bit dir im

garte, womer gfüürlet hei und mer aus so

gschichte hesch verzeut, woni mi hüt leider nümm cha

dra erinnere, au die länge spaziergäng im waud im

früehlig und z erste mau klavier gspiut näbe dir, bi dir

übernachtet und jedes mau angst gha vorem dunkle chäuer und du wo

immer glachet und gseit hesch, wenn der dunkli orte angst mache, de

muesch der se eifach mit liecht vorsteue, mini chliini, z zwöit mit

vanilleglace auti western-fiume gluegt und speter zäme mis

auererste bier trunke, immer irgendwenn e blick

zrügg ufnes wit entfärnts früecher, i checke ersch hüt, dass du die

meiste sache nur mir und niemer anderem verzeut hesch und i wünscht, i

wär mängisch ehrlecher gsi mit dir, i hoffe du weisch das, aber

trotzdem

–

au die zyt, au die zyt,

daddy, daddy,

wo söui bloss

häre dermit?

–

ig ha dis gsicht mit auem drum und dra imne

vakuum zmitzt i mim härz verschlosse, ohni

abloufdatum, aber t zyt tickt trotzdem witer, sie breitet ihri

flügu us und leit sech über jede egge und jede schatte vo mim

zimmer am 2 am morge, immer wieder der gedanke, dases üsi

zyt wär gsi, das für immer vo jetzt, du bisch der afang ohni ändi und ig

weiss nid, wenn dass sech das ändlech mau

weniger fausch wird afüehle, du fäusch fasch

überau, und dert wo nid, bini meistens säuber nid derbi, ig

wünscht i wüsst,

–

au die zyt, au die zyt,

daddy, daddy,

wo söui bloss

häre dermit?

–

wiu eis vakuum irgendwie nid längt.

17/03/2018

©Sibyl Kurz