billymilja

–

der himu het wieder das

ganz spezieue grau, fasch e chlei wie

ufgmaut, eifach in wasserfest, uf de

decher vor autstadt hocke tube und der

wind luftet es par bletter und e

läre plastiksack über t strass, der

vierer hautet immer no ir

kurve vom chines, wo riis und

poulet für 8.- verchouft, vorem

denner am egge ir nidougass hange

immer die gliche gstaute ume und es

par chlini ching kurve mit ihrne

velos zwüsche de aute böim düre und

lüte und lache, am zentrauplatz dräit immer no die

grossi roti uhr und zeigt

t zit ah und när z datum und

när wieder t zit, bim

provi stöh geng no die

tische vorusse us houz, wome a

deune öbe sis portemonnaie het vergässe und a

angerne si stouz, die türkisigi fassade vom

comet gseht nümm ganz so sexy us wie ou scho und i ha ou nach

au dene jahr nonid würklech begriffe, wenn de

huere lade eigentlech mau offe het, aber

vilech mueses so si, wiu der

einzig burger woni je dert inne gässe ha, isch

fantastisch gsi, und wäres meh aus eine gsi, wärs vilech

angers gsi, i weisses nid, e

haubi ladeüberschrift lüchtet vore husfassade und

reflektiert sech im asphaut vor bahnhofstrass, im

rio hocke t lüt am schärme unger der sunnestore und

luege i räge use, sie

rouche und trinke kaffi und

würke so bewundernswärt stressresistent, ufem

gleis am bahnhof bout hinger mir eine e joint, t wuuche hange

wie agstout vor der jurachetti und

bewege sech meistens nid weg vo dert obe, a

schöne täg gseht me vo hie bis zum

chasseral, vom

pavillon bis zur petersinsle, vom

chessu bis zum rolexgeböide und vo

mir deheime us mängisch bis zu

dim huus,

irgendwenn zwüschem dritte und

vierte fürabebier seiter, scheissegau, wie

lang de wäg bisch gsi, es

füeut sech niene so ah wie hie, wiu das hie isch eifach

heimat, und i

hätts vilech angers gseit, aber

ungerem strich isches gloub genau

das.

–

07/10/2019 // 18:01

–

© Sibyl Kurz