billymilja

–

t sunne isch tief gstande und dis lache schief, wie

immer, t luft het nach lavendu gschmöckt, vo

witem het me es paar möve ghört, mir si der

ganz tag dusse umeghanget, du hesch der

unbedingt es tattoo weue la stäche und ig bi no

nie gnue guet gsi, zum dir die ideene wieder uszrede, zudem isches es

recht cools tattoo gsi, aber das hätti natürlech nie

weue zuegä, am abe simer mit de angere richtig

innestadt mitem gfüeu im buuch, aus würd t wäut eifach

nume üs ghöre, wahrschinlech het sie das i dem

moment ou fasch e chlei, emu weni a de obe zruggdenke, de

gsehni immer nume üs i dem biud, mir hei

fiu z fiu bier trunke, aber das

merkt me ja leider ersch im

nachhinhein, du hesch unbedingt i de eint

schuppe weue, wiu die so fiu poster hei gha dert

inne, und womer dert si acho heimer tanzt, aber

recht schneu nume no gschwitzt, im

bus für hei heimer uf t kurve müesse achte, wiu üs aune chlei

sturm isch gsi, dini chatz het uf dim

bett pennet womer dehei si acho und üs rächt

abschetzig agluegt, wose ufgschreckt hesch, du hesch

gseit du wöugsch no eini rouche vorem schlofe und nach

15 minute hani di am chuchitisch gfunge, du hesch

grinset und gseit, lueg, was gfunge ha, und vor dir ufem

tisch isch der chueche gstande mit farbige gummibärli druffe, mir hei

aui drabgässe wie früecher amigs mit 6i, wo t glasur no z

spannendste isch gsi a auem, mir hei jedes

einzelne gummibärli schneu agluegt, ner heimers

gässe und üs aglachet, dusse isches

langsam häu worde und wo t sunne isch

ufgange, simer ganz überrascht gsi und hei kei

ahnig gha, wie die zit so schneu het chönne düre ga, mir hei doch

schliesslech nume gredt, mir hei nume gredt, dert am

chuchitisch i dire fasch lääre wohnig am

morge nach dim auerletschte geburi uf dere wäut.

–

08/10/2019 // 22:56

und i mache die rote immer no uf t site für di.

© Sibyl Kurz