billymilja

jez si sie da, au dini sache, mitemne nid so überzügt
chläbende post-it dranne mit mim name druf, verpackt i
zitigspapier stöh sie uf mim chuchitisch, unschuldig und
verlore, und i luege se ah, aus chönnte sie öppis derfür.

jez si sie da, au dini sache, und überfordere mi, über-
wäutige mi, heimatlosi fetze vo erinnerige, aues schmöckt nach
dir, nach wiude blueme, nach chindheit und
zmittagesse i dire wohnig, wie bi auem hani ou bi dem nid ufpasst,
wenn dases z letschte mau isch gsi, wenn dasmer
z letschte mau zuegwunke hesch, vom chuchifänster us über
t strass zur bushautesteu übere, gwunke, bis der bus a dim
hus verbigfahre isch.

jez sie si da, au dini sache, und luege mi ah, stumm und
erwartigsvou und warte uf ihre platz und i blibe eifach hocke und
stiere zrügg i ihri richtig und weiss nid so gnau, wasi de eigentlech mitne seu, wiu
jez wo si da si, au dini sache, wetti doch eigentlech
eifach nur di. 

24.03.2025 // 19:54
vor liebi tränkt, ir sunne tröchnet, liecht und farbig, für immer.

© Sibyl Kurz