billymilja

no einisch ider zit zrügg,
no einisch ider zit zrügg,
eifach no einisch näbe di und
zit flügt.

nid zum öppis angers mache, aber
vilech ar wäut zum trotz,
zum di no
einisch ghöre lache,
wiu i weiss nümm wie das tönt,
i weiss no,
dasi di ganz sicher würd erchenne,
aber wieso dasi mir sicher bi,
weissi säuber gar nid recht,
vilech giengs mer meh um z gfüeu dervo,
di zwüsche hundert mönsche no z entdecke,
vo witem irgendwo,
u ner gseh, wie du mi gsehsch
und wiede winksch
und ig ner o.

no einisch ider zit zrügg,
no einisch ider zit zrügg,
eifach no einisch näbe di und
zit flügt.

damit mer kes
detail vo dir entgeit,
damiti mi cha hebe dran,
damiti mer cha säge ou wenns dunku wird,
hani öppis womi treit,
und i weiss ou,
dass das nur im chopf no funktioniert,
dass mer die idee ja vilech hiuft gäg
aues, wo im
läbe so passiert,
oder vilech tönt das ou nur guet,
wiu was hiuft mer de t idee
vo öppisem, wo
gar nümm existiert,
wo nümm schnuufet u nümm zuelost,
womi nümm umarmt und
mini sorge so haubiert?

no einisch ider zit zrügg,
no einisch ider zit zrügg,
eifach no einisch näbe di und
zit flügt.

nid zum öppis angers mache, aber
vilech ar wäut zum trotz,
damiti mi cha satt-
luege a dim gsicht,
damiti am
abe cha go schlafe und cha wüsse,
ou morn
bisch geng no da,
damiti no
einisch dini stimm cha ghöre,
eifach mi cha si,
damiti dert cha luft
hole für das
läbe ohni di,
weisch,
vilech ou eifach nur für mi.

no einisch ider zit zrügg,
no einisch ider zit zrügg,
eifach no einisch näbe di und
zit flügt.

26/02/2026 // 18:55

© Sibyl Kurz